طريقه عمل العدس الأصفر

نبدأ بالصلاه والسلام على نبينا محمد ( ص )

هو طريقته سهله بس عايزه طوله بال لأنها طويله شويه وبالتفصيل الممل عشان أخونا الشباب

خدوا نفس عميق ويييييييلا بينا

المقادير :

عدس أصفر

1 طماطم متوسطه

1 بصله وسط

1 بطاطس

6 فصوص ثوم مقشر ومش مفروم زى ما هو يعنى

1 جزره متوسطه الحجم

الطريقه :

هنغسل العدس كويس ونضعه فى حله ونضع عليه كميه مناسبه من الماء يعنى نصف الحله تقريباً

بعد كده هنحط الطماطم والبصل والثوم

ونبشر الجزر والبطاطس بمبشره البصل عشان تبقى سهله فى السوى

ونسيبه على النار من غير تقليب خالص فى الأول

نشوفه من فتره للتانيه لو محتاج ماء نزوده شويه لحد ما نحس أن كل المكونات أستوت نقلبه

وبعد كده نحطه فى مصفه واسعه ونحط تحته حله أو أى حاجه واسعه ونقلبه ونصفيه بمعلقه أو بأدينا

لحد ما يتصفى خالص

ونحطه على النار ونحط عليه الملح والكمون والفلفل وشطه حسب الحاجه ونسيبه يغلى شويه

وبعد كده هنجيب معلقه ونصف شعريه ونحمرها فى طبق مع شويه زيت ونحطها على العدس

ونسيبه بقى لحد ما الشعريه تستوى جواه

نحضر 4 فصوص ثوم مدقوق
ونحطهم على النار مع شويه زيت لما يصفر لونهم نشلهم من على النار ونحطهم
على العدس ونضيف شويه كمون ونغطى الحله كويس

لو عايزين نعمله فته " بالعيش " مش هنحط شعريه خالص ونجهز عيش ناشف ونكسره ونحط العدس عليه وهو سخن ونغطيه كويس لفتره عشان يتشرب كويس

وممكن نعمله دقه بالخل والثوم نصفر شويه ثوم ونحط عليهم شويه خل وليمون ونحطهم على الفته

وبكدا نكون تقريباً خلصنا هــــــاااا فهمتوا حاجه

بالهنا والشفا